មូលនិធិអភិវឌ្ឍន៍ជំនាញ

Skills Development Fund

មូលនិធិអភិវឌ្ឍន៍ជំនាញ

Skills Development Fund

  1. កម្រង​សំណួរ-ចម្លើយ

អំពីព័ត៌មានទូទៅរបស់់ SDF

មូលនិធិអភិវឌ្ឍន៍ជំនាញ (SDF) គឺជាបរធនបាលកិច្ច ដែលមានចក្ចុវិស័យក្លាយជាថ្នាលហិរញ្ញប្បទានប្រកបដោយទំនុកចិត្តបំផុតក្នុងការអភិវឌ្ឍជំនាញដែលត្រូវនឹងតម្រូវការវិស័យឯកជនប្រកបដោយប្រសិទ្ធភាព និងចីរភាព ដើម្បីចូលរួមសម្រេចនូវចក្ខុវិស័យឆ្នាំ២០៣០ និង ២០៥០ របស់រាជរដ្ឋាភិបាលកម្ពុជា។
SDF បង្កើតដំបូងជាគម្រោងសាកល្បង ដោយក្រសួងសេដ្ឋកិច្ចនិងហិរញ្ញវត្ថុ តាំងពីខែមីនា ឆ្នាំ២០១៨ ហើយបានចាប់ផ្តើមទទួលសំណើគម្រោងបណ្ដុះបណ្ដាលជំនាញលើកទី១ នៅខែកក្កដា ឆ្នាំ២០១៨។  

នៅឆ្នាំ ២០២៣, រាជរដ្ឋាភិបាលកម្ពុជា បានប្រែក្លាយគម្រោងសាកល្បងនេះ ទៅជាបរធនបាលកិច្ច (Trust Fund) ក្រោមឈ្មោះ “មូលនិធិអភិវឌ្ឍន៍ជំនាញ” (SDF) តាមរយៈអនុក្រឹត្យលេខ៩៧ អនក្រ.បក ចុះថ្ងៃទី១៨ ខែឧសភា ឆ្នាំ២០២៣ ដោយមានក្រុមប្រឹក្សាបរធនបាលដែលមានសមាសភាពមកពីក្រសួងសេដ្ឋកិច្ចនិងហិរញ្ញវត្ថុ, ក្រសួងពាក់ព័ន្ធ និងថ្នាក់ដឹកនាំឧស្សាហកម្ម។
ស្របតាមគោលដៅ​យុទ្ធសាស្ត្រ ​​នៃគោលនយោបាយ​អភិវឌ្ឍន៍វិស័យ​ឧស្សាហកម្ម ២០១៥-២០២៥ ដើម្បីឆ្លើយតបទៅនឹងបញ្ហាកង្វះជំនាញពលកម្មដែលជាកត្តារាំងស្ទះដល់ការសម្រេច​​ទិសដៅចក្ខុវិស័យប្រែក្លាយកម្ពុជាឱ្យទៅជាប្រទេសដែលមានចំណូលមធ្យមកម្រិតខ្ពស់នាឆ្នាំ២០៣០, រាជរដ្ឋាភិបាលកម្ពុជាបង្កើត SDF ដើម្បីបង្កើនទំនុកចិត្ត ជំរុញ និងលើកកម្ពស់ការចូលរួមពីវិស័យឯកជនតាមរយៈសហហិរញ្ញប្បទានក្នុងការបណ្តុះបណ្តាលជំនាញដែលឆ្លើយតបទៅនឹងតម្រូវការពិតប្រាកដរបស់សហគ្រាស។ SDF ផ្តល់សហហិរញ្ញ-ប្បទានក្នុងគម្រោងបណ្ដុះបណ្ដាលជំនាញរួមគ្នាដោយសហគ្រាស-រោងចក្រ និងគ្រឹះស្ថានបណ្តុះបណ្តាល ដើម្បីបំពេញតម្រូវការជំនាញជាក់ស្តែងរបស់ឧស្សាហកម្ម។
What core programs does SDF have?
ក្រៅពីបានទទួលថវិកាបណ្តុះបណ្តាលជំនាញដែលជាតម្រូវការពិតប្រាកដក្នុងទីផ្សារការងារ, ស្ថាប័នដែលចូលរួមសហការជាមួយ SDF ក៏អាចបង្កើនទំនាក់ទំនងបន្ថែមទៀតជាមួយដៃគូផ្សេងៗរបស់ SDF រួមមានសហគ្រាស-រោងចក្រ, សមាគមពាណិជ្ជកម្ម គ្រឹះស្ថានបណ្តុះបណ្តាល, ដៃគូអភិវឌ្ឍន៍នានា និងអង្គការក្រៅរដ្ឋាភិបាលជាដើម។ ទាំងនេះជាឱកាសដែលស្ថាប័នទាំងអស់អាចពិចារណាសហការគ្នា ក្នុងការចូលរួមអភិវឌ្ឍជំនាញបុគ្កលិករបស់ខ្លួន និងពង្រីកកិត្តិនាមស្ថាប័នផងដែរ។ 
សហគ្រាស-រោងចក្រ សមាគមពាណិជ្ជកម្ម គ្រឹះស្ថានបណ្តុះបណ្តាល (សាធារណៈ, ឯកជន និងអង្គការក្រៅរដ្ឋាភិបាល) អាចសហការជាមួយនឹងមូលនិធិអភិវឌ្ឍន៍ជំនាញបាន។
ចំណាំៈ គ្រប់ស្ថាបន័ទាំងអស់ត្រូវចុះបញ្ជីឱ្យបានត្រឹមត្រូវ។ 
គ្រប់ស្ថាប័នណាដែលបានចុះបញ្ជីត្រឹមត្រូវក្នុងប្រទេសកម្ពុជា មានលក្ខខណ្ឌគ្រប់គ្រាន់ក្នុងការរៀបចំសំណើគម្រោងបណ្ដុះបណ្ដាលជំនាញ​មកកាន់ SDF បាន។ យ៉ាងណាមិញ, SDF លើកទឹកចិត្តតំណាងសហគ្រាស-រោងចក្រ រៀបចំសំណើគម្រោងស្នើសុំថវិកា ពីព្រោះ SDF ផ្តល់ការគាំទ្រលើគម្រោងបណ្ដុះបណ្ដាលជំនាញដែលជាតម្រូវការពិតប្រាកដរបស់ឧស្សាហកម្ម។ 
SDF ប្រើប្រាស់សំណើគម្រោងបណ្ដុះបណ្ដាលរួមគ្នា ដែលមានន័យថា សហគ្រាស-រោងចក្រ និងគ្រឹះស្ថានបណ្ដុះបណ្ដាល សហការគ្នាបង្កើតគម្រោងបណ្ដុះបណ្ដាលរួមគ្នា ឬសំណើគម្រោងបណ្ដុះបណ្ដាលរួមគ្នា។
បច្ចុប្បន្ននេះ SDF ទទួលបានថវិកាសម្រាប់គាំទ្រការបណ្តុះបណ្តាលជំនាញពីរាជរដ្ឋាភិបាលកម្ពុជា តាមរយៈក្រសួងសេដ្ឋកិច្ចនិងហិរញ្ញវត្ថុ, ធនាគារអភិវឌ្ឍអាស៊ី និងទីភ្នាក់ងារអភិវឌ្ឍន៍បារាំង។ 

កត្តាដែលធ្វើឱ្យ SDF ខុសប្លែកគឺ៖

   - ម៉ូដែលគម្រោងបណ្ដុះបណ្ដាលជំនាញ៖ SDF គោរព និងឈរលើគោលការណ៍ភាពជាដៃគូរវាងវិស័យសាធារណៈ និងវិស័យឯកជន (PPP) ដែល SDFតែងតែធ្វើការលើកទឹកចិត្តដល់ សហគ្រាស-រោងចក្រ ​ក្នុងការស្វែងរកដៃគូសហការ និងរៀបចំសំណើគម្រោងបណ្ដុះបណ្ដាលជំនាញជាមួយនឹងគ្រឹះស្ថានបណ្តុះបណ្តាលជំនាញ។ រាល់សំណើគម្រោងណាដែលមានការអនុវត្តផ្ទាល់ច្រើននៅក្នុងសហគ្រាស-រោងចក្រ សំណើនោះនឹងអាចត្រូវបានដាក់ពិន្ទុខ្ពស់ ក្នុងពេលវាយតម្លៃសំណើបណ្តុះបណ្តាលនោះ។

   - ទម្រង់ហិរញ្ញប្បទាន៖ SDF មិនមានគោលការណ៍ចូលរួមបដិភាគជាហិរញ្ញប្បទានទាំងស្រុង​ (១០០​ %)នោះទេ។ សហគ្រាស-រោងចក្រ និងគ្រឹះស្ថានបណ្តុះបណ្តាលត្រូវចូលរួមបដិភាគក្នុងសំណើគម្រោងបណ្ដុះបណ្ដាលជំនាញដែលស្នើមក SDF ដែលវិភាគទាននេះអាចមានរូបភាពជាហិរញ្ញវត្ថុ ឬមិនមែនហិរញ្ញវត្ថុ (in cash or in kind)។

   - និយមន័យ “ជំនាញដែលមានតម្រូវការពីទីផ្សារឧស្សាហកម្ម (Demand-driven skills)”៖ SDF ចាត់ទុកជំនាញដែលមានតម្រូវការពីទីផ្សារឧស្សាហកម្ម ជាជំនាញទាំងឡាយណាដែលត្រូវបានសហគ្រាស-រោងចក្របង្ហាញ ឬបញ្ជាក់ច្បាស់ពីតម្រូវការជាក់ស្តែង។ ឬម្យ៉ាងទៀតមានន័យថា ជំនាញដែលត្រូវបានកំណត់ដោយឧស្សាហកម្ម ។ 

ដើម្បីធ្វើឱ្យប្រាកដថាជំនាញមួយពិតជាមានតម្រូវការមែន, អ្នករៀបចំសំណើគម្រោងបណ្តុះបណ្តាលត្រូវតែធ្វើការបញ្ជាក់ក្នុងលក្ខខណ្ឌ មួយ​ក្នុងចំណោម​លក្ខខណ្ឌខាងក្រោម៖

   • គ្រប់សិក្ខាកាមនឹងត្រូវបានផ្តល់ការងារធ្វើពិតប្រាកដពីក្រុមហ៊ុនណាមួយ (សម្រាប់តែវគ្គបណ្តុះបណ្តាលត្រៀមចូលទីផ្សារការងារ Pre-employment) ឬ
   • សំណើគម្រោងត្រូវរៀបចំឡើងដោយតំណាងក្រុមហ៊ុន-សហគ្រាស (មិនមែនរៀបចំដោយគ្រឹះស្ថានបណ្តុះបណ្តាល)។
SDF លើកទឹកចិត្តដល់ស្ថាប័នដែលគ្រោងនឹងរៀបចំសំណើគម្រោងថា ដើម្បីជ្រាបច្បាស់ពីជំនាញជាក់លាក់ដែលមានតម្រូវការពីឧស្សាហកម្ម តំណាងស្ថាប័នគួរពិភាក្សាជាមួយនឹងដៃគូដែលជាវិស័យឯកជនដើម្បីសិក្សាបន្ថែម និងកំណត់ជំនាញ។ SDF មិនមានលទ្ធភាពគ្រប់គ្រាន់ក្នុងការកំណត់ជំនាញនោះទេ ប៉ុន្តែ SDF រីករាយនឹងណែនាំដៃគូរបស់ SDF (SDF network) ប្រសិនបើមានការស្នើសុំពីស្ថាប័នដែលគ្រោងនឹងដាក់សំណើគម្រោងបណ្តុះបណ្តាលរួមគ្នា។
ចំណាំ: SDF មិនអាចចូលរួមសហហិរញ្ញប្បទានរាល់គ្រប់ប្រភេទនៃការបណ្តុះបណ្តាលជំនាញនោះទេ។ SDF មានគោលការណ៍ជាក់លាក់ (មានភាពបត់បែនខ្លះ) ដើម្បីធានាដល់ប្រសិទ្ធភាព និងស័ក្តិសិទ្ធិភាពក្នុងការវិភាជថវិកាបណ្តុះបណ្តាលជំនាញ។


អំពីព័ត៌មាន និងលក្ខខណ្ឌក្នុងសំណើគម្រោងបណ្តុះបណ្តាល

ក្រុមសិក្ខាកាមគោលដៅក្នុងវគ្គបណ្តុះបណ្តាលជំនាញក្នុងគម្រោងបណ្ដុះបណ្ដាលជំនាញដែល SDF ចូលរួមសហហិរញ្ញប្បទាន នោះ គឺជាក្រុមបុគ្គលដែលបម្រើការងារនៅតាមសហគ្រាសធុនធំ មធ្យម និងតូច, គ្រូបង្គោល, ម្ចាស់ និងថ្នាក់ដឹកនាំក្រុមហ៊ុនតូច និងមធ្យម, បុគ្គលដែលមិនទាន់ការងារ, និងបុគ្គលដែលត្រៀមចូលទីផ្សារការងារ (សិស្ស ឬនិស្សិត)។ 
SDF ផ្តល់សហហិរញ្ញប្បទានលើវគ្គបណ្តុះបណ្តាលត្រៀមចូលទីផ្សារការងារ, បំប៉នជំនាញបន្ថែម និងបណ្តុះបណ្តាលជំនាញសារជាថ្មី។
SDF ផ្តល់សហហិរញ្ញប្បទានដល់គម្រោងបណ្ដុះបណ្ដាលជំនាញ ដែលស្ថិតក្នុងវិស័យអាទិភាពចំនួនប្រាំមួយ (៦) ដូចជា៖ ១. កម្មន្តសាល, ២. ឧស្សាហកម្មផ្នែកអេឡិចត្រូនិច, ៣. ឌីជីថល, ៤. សំណង់, ៥. ទេសចរណ៍ និងបដិសណ្ឋារកិច្ច និង ៦. យានយន្ដ។ 
ទន្ទឹមនេះ, SDF នឹងពិចារណាសំណើគម្រោងដែលពុំស្ថិតក្នុងវិស័យអាទិភាពខាងលើផងដែរ ប្រសិនបើសំណើគម្រោងបានបញ្ជាក់ច្បាស់លាស់ពីតម្រូវការពលកម្មជំនាញពិតប្រាកដពីដៃគូឧស្សាហកម្ម ដែលនេះត្រូវបានចាត់ទុកជាជំនាញដែលមានតម្រូវការខ្ពស់ (Emerging skills) ដោយរាប់បញ្ចូលទាំងជំនាញបច្ចេកទេស និងជំនាញទន់។
មិនមែនទេ។ SDF ធ្វើការគាំទ្រលើគ្រប់កម្រិតនៃការបណ្តុះបណ្តាលជំនាញទាំងឡាយណាដែលស្ថិតក្នុងវិស័យអាទិភាពទាំង៦ និងជំនាញដែលមានតម្រូវការពិតប្រាកដ (ក្រៅវិស័យអាទិភាព)។ SDF រីករាយសហការជាមួយគ្រប់ស្ថាប័នដែលមានគម្រោងដាក់សំណើគម្រោងបណ្ដុះបណ្ដាលជំនាញទាំងឡាយណាដែលមានតម្រូវការពិតជាក់ស្តែងក្នុងទីផ្សារឧស្សាហកម្ម។

អំពីសំណើគម្រោងបណ្តុះបណ្តាល និងគម្រោងបណ្តុះបណ្តាលដែលត្រូវបានជ្រើសរើស

សមាគមពាណិជ្ជកម្ម ក្រុមហ៊ុន រោងចក្រ សហគ្រាស និងគ្រឹះស្ថានបណ្តុះបណ្តាល អាចរៀបចំ និងដាក់សំណើស្នើសុំសហហិរញ្ញប្បទានមកកាន់ SDF តាមរយៈប្រព័ន្ធគ្រប់គ្រងគម្រោង (Project Management System: PMS) pms.sdfcambodia.org។ 
សូមចូលទៅកាន់ដំណរនេះ ដើម្បីសិក្សាពីរបៀបបង្កើតគណនី និងរបៀបដាក់សំណើគម្រោងបណ្ដុះបណ្ដាលជំនាញ (link)។

ចាប់ពីថ្ងៃទី ០៦ ខែមេសា ឆ្នាំ២០២១ SDF នឹងបើកទទួលរាល់សំណើស្នើសុំហិរញ្ញប្បទាន ដោយគ្មានកាលបរិច្ឆេទកំណត់បិទទទួលសំណើគម្រោងបណ្ដុះបណ្ដាលជំនាញនោះទេ។  នៅពេលដែលសហគ្រាស-រោងចក្រ និងគ្រឹះស្ថានបណ្តុះបណ្តាលមានតម្រូវការជំនាញជាក់លាក់ តំណាងស្ថាប័នអាចរៀបចំសំណើគម្រោងបណ្ដុះបណ្ដាលជំនាញ និងឯកសារពាក់ព័ន្ធ រូចធ្វើការផ្ញើមកកាន់ SDF តាមប្រព័ន្ធគ្រប់គ្រងរបស់មូលនិធិអភិវឌ្ឍន៍ជំនាញ (PMS link)។ 
ក្នុងការស្នើសុំសហហិរញ្ញប្បទានមកកាន់ SDF ស្ថាប័ន និងដៃគូរៀបចំសំណើ គួរយកចិត្តទុកដាក់ជាចម្បងលើលក្ខខណ្ឌសំខាន់ៗចំនួនប្រាំពីរ (៧) ដូចខាងក្រោម ៖
១. កិច្ចព្រមព្រៀងរវាងសហគ្រាស-រោងចក្រ និងគ្រឹះស្ថានបណ្តុះបណ្តាល
២. ការកំណត់ក្រុមគោលដៅ
៣. ការរៀបចំផែនការនៃវគ្គបណ្តុះបណ្តាល 
៤. គុណវុឌ្ឍិនៃគ្រូបង្គោល
៥. ការកំណត់សូចនាករសមិទ្ធកម្ម (KPIs)
៦. ការរៀបចំផែនការចំណាយ និង
៧. ការចូលរួមបដិភាគសម្រាប់ការបណ្តុះបណ្តាល
សូមអានការណែនាំក្នុងការរៀបចំសំណើគម្រោងបណ្ដុះបណ្ដាលជំនាញ (SDF Proposal Guideline) ដើម្បីបានព័ត៌មានលម្អិតបន្ថែមតាមរយៈតំណរនេះ (link)។
រាល់ម្ចាស់សំណើគម្រោងបណ្ដុះបណ្ដាលជំនាញទាំងអស់តម្រូវឱ្យធ្វើការភ្ជាប់ឯកសារគោលសំខាន់ៗដូចជា៖ ១. កិច្ចព្រមព្រៀងរវាងសហគ្រាស-រោងចក្រ និងគ្រឹះស្ថានបណ្ដុះបណ្ដាល, ២. ប្រវត្តិសង្ខបរបស់គ្រឹះស្ថានបណ្តុះបណ្តាល, ៣. ប្រវត្តិរូបរបស់គ្រូបង្គោល, ៤. បញ្ចីគណនីរបស់តំណាងស្ថាប័នរៀបចំសំណើគម្រោង, ៥. ប្រវត្តិសង្ខេបរបស់សហគ្រាស-រោងចក្រ និង ៦. បញ្ជីឈ្មោះ និងព័ត៌មានសិក្ខាក្ខាម (សម្រាប់វគ្គបំប៉នជំនាញ)។ 
សូមស្វែងយល់ព័ត៌មានលម្អិតបន្ថែមក្នុងបញ្ញីរាយឯកសារ (Checklist) តាមរយៈតំណរនេះ (link)។
ដំណើរការវាយតម្លៃសំណើគម្រោងអាចនឹងត្រូវប្រើពេលប្រមាណជា ២ខែ។ គ្រប់ម្ចាស់សំណើគម្រោងទាំងអស់អាចតាមដានពីដំណើរការសំណើក្នុងគណនីរបស់ខ្លួន ក្រោយពេលដាក់សំណើគម្រោងហើយ។ រាល់លទ្ធផលជាប់/ធ្លាក់ក៏នឹងត្រូវបានជម្រាបជូនតាមរយៈអ៊ីម៉ែលផងដែរ។
រាល់សមាគមពាណិជ្ជកម្ម សហគ្រាស-រោងចក្រ និងគ្រឹះស្ថានបណ្តុះបណ្តាលនីមួយៗ អាចរៀបចំ និងដាក់ពាក្យស្នើសុំសហហិរញ្ញប្បទានពី SDF លើសពីមួយសំណើបាន ក្នុងករណីដែលមានតម្រូវការជំនាញជាក់លាក់ពីទីផ្សារឧស្សាហកម្ម។ 
ជារួម SDF មានជំហាននៃការពិនិត្យ និងវាយតម្លៃសំណើគម្រោងបណ្ដុះបណ្ដាលជំនាញសរុបចំនួន ៧ រួមមាន៖
១. ការរៀបចំ និងដាក់សំណើ
២. ការពិនិត្យ និងផ្ទៀងផ្ទាត់ភាពត្រឹមត្រូវនៃសំណើ
៣. ការវាយតម្លៃបឋម
៤. ការធ្វើបទបង្ហាញអំពីសំណើគម្រោង
៥. ការវាយតម្លៃចុងក្រោយ និងអនុម័ត
៦. ការជូនដំណឹងអំពីលទ្ធផល និង
៧. ការចុះកិច្ចសន្យា និងអនុវត្តគម្រោង។ 
សូមអានការណែនាំក្នុងការរៀបចំសំណើគម្រោងបណ្ដុះបណ្ដាលជំនាញ (SDF Proposal guidelines) ដើម្បីបានព័ត៌មានលម្អិតបន្ថែមតាមរយៈតំណរនេះ (link)។

ក្រោយពេលដាក់សំណើគម្រោងបណ្តុះបណ្តាល និង អំឡុងពេលអនុវត្តគម្រោងបណ្តុះបណ្តាល

- សំណើគម្រោងបណ្ដុះបណ្ដាលរួមគ្នា (Joint-training proposals) សំដៅទៅលើគ្រប់សំណើគម្រោងទាំងឡាយណាដែលដាក់មកកាន់ SDF តែមិនទាន់បានវាយតម្លៃ។  
- គម្រោងបណ្ដុះបណ្ដាលរួមគ្នា (Joint-training projects) សំដៅទៅលើគ្រប់គម្រោងទាំងឡាយណាដែលត្រូវបានជ្រើសរើសផ្តល់សហហិរញ្ញប្បទានដោយ SDF។
ក្រុមការងារ SDF នឹងរៀបចំកិច្ចសន្យា និងស្នើសុំឯកសារបន្ថែម (ក្នុងករណីមិនទាន់គ្រប់គ្រាន់) ប្រសិនបើមានការចាំបាច់។ ក្រោយពេលកិច្ចសន្យាត្រូវបានរៀបចំរួចរាល់, SDF នឹងទាក់ទងតំណាងម្ចាស់គម្រោងបណ្ដុះបណ្ដាលជំនាញមកចុះហត្ថាលេខា និងរៀបចំបើកថវិកា ១០ ភាគរយក្នុងដំណាក់កាលដំបូងក្រោយចុះហត្ថលេខាហើយ។
ជាគោលការណ៍របស់ SDF លោកអ្នកមិនអាចស្នើសុំ និងទទួលបានថវិកាបណ្តុះបណ្តាលទាំងអស់ក្នុងពេលតែម្តងបានទេ។ ការទូទាត់ថវិកា ជាទូទៅចែកចេញជាបួន (៤) ដំណាក់កាលដូចខាងក្រោម៖
 i. ដំណាក់កាលទី១៖ ទូទាត់ថវិកាដប់ភាគរយ (១០%) បន្ទាប់ពីចុះហត្ថលេខាលើកិច្ចសន្យា និងឧបសម្ព័ន្ធភ្ជាប់ក្នុង                                     កិច្ចសន្យា។
 ii. ដំណាក់កាលទី២៖ ទូទាត់ថវិកាសែសិបភាគរយ (៤០%) បន្ទាប់ពីការជ្រើសរើសសិក្ខាកាមបានចប់សព្វគ្រប់ និងត្រៀមរួចរាល់ ដើម្បីចាប់ផ្តើមបើកវគ្គបណ្តុះបណ្តាល។
 iii. ដំណាក់កាលទី៣៖ ទូទាត់ថវិកាសាមសិបភាគរយ (៣០%) បន្ទាប់ពីអនុវត្តវគ្គបណ្តុះបណ្តាលបានពាក់កណ្តាល ហើយក្នុងលក្ខខណ្ឌដែលអត្រាបោះបង់ការសិក្សាក្រោមការសន្យា ព្រមទាំងមានភ្ជាប់ឯកសារតម្រូវ។
 iv. ដំណាក់កាលទី៤៖ ទូទាត់ថវិកាម្ភៃភាគរយ (២០%) បន្ទាប់ពីវគ្គបណ្តុះបណ្តាលសម្រេចបានសូចនាករសមិទ្ធកម្មគន្លឹះ (KPIs) ដូចដែលបានបញ្ជាក់ក្នុងសំណើសុំគម្រោង ហើយបន្ទាប់ពី SDF វាយតម្លៃផ្ទៀងផ្ទាត់ត្រឹមត្រូវចប់សព្វគ្រប់យ៉ាងយូរបី (៣) ខែ ក្រោយពីបិទវគ្គបណ្តុះបណ្តាល ដែលសូចនាករសមិទ្ធកម្មគន្លឹះនីមួយៗឯករាជ្យពីគ្នា ។
កំណត់ចំណាំ៖ ផែនការទូទាត់ថវិកានេះ អាចកែសម្រួលបាន ប្រសិនបើមានភាពចាំបាច់។

ម្ចាស់គម្រោងបណ្ដុះបណ្ដាលជំនាញអាចប្រើប្រាស់ថវិកាបណ្តុះបណ្តាលបដិភាគរបស់ SDF សម្រាប់ប្រភេទចំណាយចំនួន ៥ប្រភេទ ដូចជា៖ ១. ប្រាក់ខែ ឬថ្លៃឈ្នួលគ្រូបង្គោល, ២. ប្រាក់ឧបត្ថម្ភសិក្ខាកាម, ៣. សម្ភារៈបណ្តុះបណ្តាល (មិនមែន Fixed Asset), ៤. ចំណាយទឹក និងភ្លើង និង ៥. រដ្ឋបាលផ្សេងៗ។ 

ក្រុមការងារ SDF នឹងធ្វើការសិក្សាលម្អិតជាមួយម្ចាស់គម្រោង។ SDF នឹងផ្តល់ការប្រឹក្សា និងយោបល់ទៅម្ចាស់គម្រោង តាមលក្ខខណ្ឌសមស្របដែលអាចជួយសម្រួលមុននឹងឈានដល់ការបណ្តុះបណ្តាលជាក់ស្តែង។ 
អំឡុងពេលដំណើរការការបណ្តុះបណ្តាល គ្រប់ម្ចាស់សំណើគម្រោងទាំងអស់ តម្រូវឱ្យរៀបចំ និងផ្ញើឯកសារជាប្រចាំមកSDF ដែលឯកសារទាំងអស់នោះដែលរួមមាន៖ ១. បញ្ចីវត្តមានសិក្ខាកាម (ជាខែ ឬអំឡុងពេលកំណត់ណាមួយ) និង ២. ខ្លឹមសារមាតិកាបណ្តុះបណ្តាល (ប្រសិនបើមានការផ្លាស់ប្តូរឬកែសម្រួល)។ ក្រុមការងារត្រួតពិនិត្យ និងវាយតម្លៃគម្រោងរបស់ SDF នឹងធ្វើបទបង្ហាញខ្លីមួយដល់ម្ចាស់គម្រោងបណ្ដុះបណ្ដាលទាក់ទិននឹងឯកសារតម្រូវ និងដំណើរការលម្អិតមួយចំនួន។

ក្រោយពេលបញ្ចប់វគ្គបណ្តុះបណ្តាល

ក្រុមការងារ SDF នឹងចុះតាមដាន ត្រួតពិនិត្យ និងវាយតម្លៃការអនុវត្តរាល់គម្រោងបណ្ដុះបណ្ដាលទាំងឡាយ ដែលទទួលបានសហហិរញ្ញប្បទាន។ 
ប្រសិនបើម្ចាស់សំណើគម្រោងបណ្ដុះបណ្ដាលមិនអាចបំពេញគ្រប់លក្ខខណ្ឌសូចនាករសមិទ្ធកម្មគន្លឹះរបស់ SDF, ក្រុមការងារ SDF នឹងធ្វើការកាត់ចំនួនភាគរយនៃថវិកា២០% ចុងក្រោយក្នុងដំណាក់កាលទី៤។ ម្ចាស់គម្រោងនឹងទទួលបានចំនួនថវិកាសមាមាត្រស្មើគ្នានៃថវិកាទូទាត់ចុងក្រោយ ដោយផ្អែកលើចំនួនសូចនាករដែលសម្រេចបានជាក់ស្តែង។

មូលនិធិអភិវឌ្ឍន៍ជំនាញ

Skills Development Fund

អាសយដ្ឋាន: ជាន់ទី 10 មជ្ឈមណ្ឌលអភិវឌ្ឍធុរកិច្ច (BDC), មហាវិថីអូស៊ីអាយស៊ី ជ្រោយចង្វារ រាជធានីភ្នំពេញ
លេខទំនាក់ទំនង: +(៨៥៥) ២៣ ៩០១ ៥៨៣
Email: info@sdfcambodia.org

© រក្សាសិទ្ធដោយ 2020 | មូលនិធិអភិវឌ្ឍន៍ជំនាញ (SDF)

ក្រសួងសេដ្ឋកិច្ចនិងហិរញ្ញវត្ថុ(MEF)